Jer 19 | NdeIBE | STEP | Lokhu yikho akutshoyo uJehova: “Hamba uyethenga udiwo kumbumbi wezimbiza. Thatha abanye abadala babantu labanye babaphristi

Jeremiah 19

1 Lokhu yikho akutshoyo uJehova: “Hamba uyethenga udiwo kumbumbi wezimbiza. Thatha abanye abadala babantu labanye babaphristi 2 uhambe labo esigodini seBheni Hinomi, eduze lentuba yeSango loDengezi. Umemezele amazwi engikutshela wona, 3 uthi, ‘Zwanini ilizwi likaJehova, lina makhosi akoJuda lani bantu abahlala eJerusalema. UJehova uSomandla, uNkulunkulu ka-Israyeli, uthi: Lalelani! Ngizaletha umonakalo kule indawo ozabanda izindlebe zomuntu wonke owuzwayo. 4 Ngoba bangidelile kwathi indawo le bayenza eyabonkulunkulu bezizweni; kuyo batshisele imihlatshelo onkulunkulu abangabaziyo, bona labokhokho babo kanye lamakhosi akoJuda, njalo indawo le sebayigcwalisa igazi labantu abangelacala.

5 Sebakhele uBhali izindawo eziphakemeyo ukuba batshise amadodana abo emlilweni njengeminikelo kuBhali – into engingazange ngibalaye kumbe ngitsho ukuthi bayenze, kumbe ukuthi ike ifike engqondweni yami.

6 Ngakho qaphelani, izinsuku ziyeza, kutsho uJehova, lapho abantu bengayikubiza indawo le ngokuthi Thofethi loba iSigodi seBheni Hinomi kodwa iSigodi sokuBulala.

7 “Kuyonale indawo ngizawachitha amacebo kaJuda laweJerusalema. Ngizabenza bafe ngenkemba phambi kwezitha zabo, lasezandleni zalabo abafuna ukubabulala, njalo ngizanikela izidumbu zabo ukuba zibe yikudla kwezinyoni zasemoyeni lezinyamazana zeganga. 8 Idolobho leli ngizalichitha ngilenze libe yinto yokweyiswa; bonke abadlula khona bazakwesaba njalo baklolode ngenxa yamanxeba alo wonke. 9 Ngizabenza badle inyama yamadodana abo leyamadodakazi abo, njalo labo bazadlana inyama ngesikhathi esinzima sokuvinjezelwa kwabo yizitha ezifuna ukubabulala.’

10 “Emva kwalokho bulala udiwo labo abahamba lawe bekhangele, 11 ubususithi kubo, ‘UJehova uSomandla uthi: Ngizasiphahlaza isizwe lesi kanye ledolobho leli njengokuphahlazwa kodiwo lombumbi lolu olungeke lulungiswe futhi. Abafileyo bazabangcwaba eThofethi kuze kusweleke indawo. 12 Lokhu yikho engizakwenza kule indawo lakulabo abahlala lapha, kutsho uJehova. Idolobho leli ngizalenza lifanane leThofethi. 13 Izindlu zaseJerusalema kanye lezamakhosi akoJuda zizangcoliswa njengale indawo, iThofethi – zonke izindlu lapho abazatshisela khona impepha phezu kwezimpahla kuwo wonke amaxuku ezinkanyezi, bathelela abanye onkulunkulu umnikelo wokunathwayo.’ ”

14 UJeremiya wabuya evela eThofethi, lapho uJehova ayemthume ukuyatshumayela khona, wasesima egumeni lethempeli likaJehova wathi ebantwini bonke, 15 “UJehova uSomandla, uNkulunkulu ka-Israyeli, uthi: ‘Lalelani! Ngizakwehlisela kulelidolobho lasemizini elizungezileyo wonke umonakalo engawutshoyo, ngoba izintamo zabo zilukhuni njalo bayala ukulalela amazwi ami.’ ”